Një aksident tragjik ndodhi mëngjesin e së premtes në Itali, ku Xhulijana Guna, një shqiptare 32-vjeçare dhe banore e Ebolit, humbi jetën pasi u godit nga një makinë teksa po ecte në rrugë pas çuarjes së vajzës së saj në shkollë. Ngjarja ndodhi rreth orës 09:00 në autostradën shtetërore 18, pranë kthesës në Santa Cecilia. Një grua italiane 37-vjeçare që drejtonte një Fiat 500 dyshohet se humbi kontrollin e automjetit për shkak të një sëmundjeje, duke dalë nga rruga dhe përplasur Xhulijanën nga pas. Ekipet e emergjencës mbërritën në vendngjarje, por vetëm mundën të konfirmonin vdekjen e viktimës, ndërsa shoferja është shoqëruar në komisariat dhe ndodhet në gjendje shoku. Hetimet për zbardhjen e plotë të rrethanave janë ende në vazhdim, ndërsa rruga u mbyll për një kohë të gjatë për operacionet e shpëtimit dhe hetimet. Banorët vendas shprehen të tronditur nga ngjarja dhe theksojnë se kjo rrugë ka qenë shpesh skenë aksidentesh fatale.