Një aksident i rëndë trafiku ka ndodhur në rrugën “Faik Konica” në Prizren, ku një 78-vjeçar që po udhëtonte me biçikletë u godit nga një veturë tip Fiat Punto. Shoferi i dyshuar, 47-vjeçari Fatmir Iljazi, dyshohet se ka kaluar në shiritin e kundërt gjatë tentimit për t’u kyçur nga rruga “Ali Hadri”, duke shkaktuar përplasjen fatale. Pas aksidentit, viktima u dërgua fillimisht në Spitalin Rajonal të Prizrenit dhe më pas në Qendrën Klinike Universitare të Kosovës në Prishtinë, ku ndërroi jetë për shkak të plagëve të marra. Me urdhër të prokurorit, shoferi është arrestuar dhe trupi i viktimës është dërguar për obduksion, ndërsa hetimet për zbardhjen e plotë të ngjarjes vazhdojnë.