Një ngjarje tragjike ndodhi mbrëmjen e së premtes në aksin rrugor Prrenjas–Librazhd, në fshatin Hotolisht, ku një gur i madh u shkëput nga shpati i kodrës dhe ra mbi një automjet tip “Benz”. Automjeti drejtohej nga Arjan Hoxha, 42 vjeç, banues në fshatin Gjergjan të Elbasanit, i cili humbi jetën në vendngjarje për shkak të goditjes së fortë. Shërbimet e Policisë dhe grupi hetimor mbërritën menjëherë në vendin e ngjarjes dhe po punojnë për zbardhjen e plotë të rrethanave dhe dokumentimin ligjor të aksidentit. Shkaqet e shkëputjes së gurit mbeten ende nën hetim, ndërsa autoritetet pritet të japin detaje të mëtejshme në vijim.