Një ngjarje tragjike ndodhi mbrëmjen e së enjtes në Shtime, ku një fëmijë 3-vjeçar humbi jetën pasi dyshohet se u ngulfat me një copë mishi gjatë përgatitjes së një grilli në oborrin e shtëpisë së familjes. Familjarët tentuan menjëherë t’i japin ndihmën e parë dhe e dërguan urgjentisht në Qendrën Emergjente në Shtime, ku mjekët arritën të largojnë copën e mishit, por fëmija mbërriti pa shenja jete. Ai u transferua në Spitalin Rajonal në Ferizaj, ku përpjekjet për reanimim nuk dhanë rezultat, dhe vdekja u konstatua në orën 19:40. Me urdhër të Prokurorit për të Mitur, trupi u dërgua për obduksion në Institutin e Mjekësisë Ligjore, ndërsa policia ka nisur hetimet si “Hetim i vdekjes” dhe po vazhdojnë për zbardhjen e plotë të rrethanave.