Në mëngjesin e së dielës, një furgon që transportonte punëtorë nga Tirana drejt bregdetit ka dalë nga rruga në aksin Dukat–Orikum pranë Fushë-Dukatit, duke përfunduar në një kanal anësor. Si pasojë e aksidentit ka humbur jetën 52-vjeçari Ilir Haka, ndërsa pesë persona të tjerë kanë mbetur të plagosur dhe u transportuan në Spitalin Rajonal të Vlorës për ndihmë mjekësore. Për shkak të deformimit të mjetit, zjarrfikësit ndërhynë duke prerë pjesë të sediljeve për të nxjerrë të plagosurit që ishin bllokuar mes llamarinave dhe hekurave. Dyshimet paraprake për shkakun e aksidentit janë përgjumja e drejtuesit të mjetit ose një arrest kardiak, ndërsa policia rrugore po kryen hetimet për të sqaruar rrethanat e plota të ngjarjes.