Në kazermën e Forcës së Sigurisë së Kosovës në Gjakovë përfundoi me sukses trajnimi intensiv “Rangers”, ku rreth 46 pjesëtarë të Policisë së Kosovës u certifikuan pas disa javësh ushtrimesh të avancuara taktike dhe sfidash fizike. Ky program, i zhvilluar nga 3 deri më 26 maj, përfshiu pjesëtarë nga njësitë elitare të Policisë, si NJNSH, NJRSH dhe NJMA – Mbrojtja e Afërt, të cilët ushtruan së bashku me ushtarë të FSK-së. Gjatë trajnimit u zhvilluan ushtrime të përbashkëta që synojnë rritjen e bashkëpunimit dhe gatishmërisë operacionale mes institucioneve të sigurisë në Kosovë. Në ceremoninë e diplomimit, pjesëmarrësit u pajisën me certifikata që vërtetojnë përfundimin e programit, i cili konsiderohet ndër më të vështirat dhe më intensive në fushën e sigurisë.