Policia Rajonale e Ferizajt ka marrë masa ndaj tre drejtuesve të automjeteve për shkelje të rënda të rregullave të trafikut në kuadër të kontrolleve për rritjen e sigurisë rrugore. Një shofer 28-vjeçar u ndalua në fshatin Rakaj duke drejtuar me shpejtësi 161 km/h në zonë me kufizim 50 km/h, ndaj të cilit u shqiptuan gjobë prej 500 euro, 5 pikë negative dhe ndalim drejtimi për 6 muaj. Një tjetër shofer 23-vjeçar mbeti pa patentë për 12 muaj pasi kishte grumbulluar 10 pikë negative nga kundërvajtje të ndryshme, ndërsa një i tretë, gjithashtu 23-vjeçar, u gjobit me 200 euro dhe iu ndalua drejtimi për 3 muaj për tejkalim në vijë të plotë dhe në vendkalim për këmbësorë.