Policia e Lezhës ka zbuluar dhe goditur tre raste të kultivimit të bimëve narkotike Cannabis Sativa në zonat e Mirditës dhe Kurbinit, duke arrestuar tre persona në flagrancë. Gjatë operacionit, i cili u zhvillua me kontrolle nga toka dhe ajri, përfshirë përdorimin e dronëve dhe informacionet operative, u asgjësuan gjithsej 436 bimë narkotike. Të arrestuarit janë një 21-vjeçar nga Durrësi, një 47-vjeçar nga Fshat Laç dhe një 44-vjeçare nga lagjja “Rrahu i Pashës” në Laç, të cilët dyshohen se kultivonin bimët në zona të ndryshme të Lezhës. Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për hetime të mëtejshme, ndërsa bimët narkotike janë asgjësuar me anë të djegies në vend.