Policia e Kosovës ka realizuar me sukses tri ekstradime dhe një transferim të personave të dënuar dhe të kërkuar nga shtete të ndryshme drejt Kosovës, në bashkëpunim me institucionet ndërkombëtare dhe ato vendore të drejtësisë. Më 16 mars 2026 u bë transferimi nga Italia i shtetasit S.S., i dënuar për vepra të rënda penale në fushën e narkotikëve, i cili iu dorëzua Shërbimit Korrektues për të vuajtur pjesën e mbetur të dënimit prej 16 vjet e 4 muaj burgim. Më 18 mars u realizuan dy ekstradime: nga Shqipëria u soll shtetasi L.V., i kërkuar për “Legalizimin e përmbajtjes së rreme”, dhe nga Gjermania shtetasi F.G., i dënuar për “Grabitje” me një vit burgim. Më 19 mars u ekstradua nga Gjermania edhe shtetasi F.A., i kërkuar për “Shkaktim të rrezikut të përgjithshëm” dhe “Përdorim të armës apo mjetit të rrezikshëm”, i cili iu dorëzua njësive policore për procedim të mëtejshëm. Këto veprime tregojnë bashkëpunimin efektiv ndërkombëtar dhe angazhimin e institucioneve të drejtësisë në Kosovë për luftën kundër krimit.