Një ngjarje e rëndë ka ndodhur në qytetin e Beratit, ku një 30-vjeçar, i cili ishte raportuar i zhdukur prej disa ditësh, u gjet i mbytur në lumin Osum pranë fshatit Remanicë. Viktima, David Shehaj, kishte humbur kontaktet me familjen që nga data 30 prill, ndërsa denoncimi për zhdukjen e tij u bë nga i ati pranë autoriteteve policore. Pas dëshmive të banorëve të zonës që pretenduan se e kishin parë duke u hedhur në lumë, policia dhe forcat e kërkim-shpëtimit nisën operacionin për gjetjen e tij. Trupi i pajetë u lokalizua pas disa orësh kërkimesh intensive dhe u transportua për autopsi në Spitalin Rajonal të Beratit.