Me ftesë të kryetarit të Gjykatës Supreme të Kosovës, Fejzullah Rexhepi, u mbajt një tryezë diskutimi me gjyqtarë të degës penale dhe kryetarë gjykatash, ku u trajtua praktika gjyqësore lidhur me caktimin dhe vazhdimin e masës së paraburgimit. U theksua rëndësia e respektimit strikt të afateve ligjore nga prokuroritë, veçanërisht paraqitja e kërkesave për vazhdim të paraburgimit brenda pesë ditëve para skadimit të masës, për të garantuar kohë të mjaftueshme për palët. Diskutimet përfshinë edhe nevojën që kërkesat për paraburgim të mbështeten në prova të sigurta dhe arsyetime konkrete, duke shmangur vetëm parafrazimin e dispozitave ligjore, si dhe rëndësinë e paraqitjes së bazave të dyshimit dhe rrethanave të posaçme që justifikojnë masën. Në përfundim u vlerësua se këto diskutime ndihmojnë në unifikimin e praktikës gjyqësore dhe forcimin e standardeve të sundimit të ligjit në procedurat penale në Kosovë.