Gjatë ditës së sotme, në Himarë dhe Ksamil janë regjistruar dy raste ku në total 9 turistë të huaj u bllokuan në mes të detit për shkak të problemeve me mjetet lundruese. Në Himarë, një shtetas spanjoll u shpëtua pasi kajaku i tij u fundos në zonën e Filikurit, ndërsa në Ksamil, 8 turistë brazilianë u nxorën në sigurim kur skafi plastik me të cilin po lundronin rrezikonte të fundoshej pranë “Tre Ishujve”. Policia Kufitare dhe Njësia Policore Detare ndërhynë shpejt me gomone dhe mjete jet ski, duke bërë të mundur shpëtimin e tyre dhe rimorkimin e mjeteve drejt bregut. Falë reagimit të shpejtë dhe koordinuar, u shmangën pasoja serioze për jetën e turistëve, duke garantuar sigurinë e tyre në këto dy incidente të ndodhura në zona turistike.