Prokuroria Themelore Publike e Gostivarit ka nisur procedurë hetimore ndaj tre zyrtarëve të ndërmarrjes publike “Komunalec” për shkak të ndotjes së ujit të pijshëm në Komunën e Gostivarit dhe fshatrat përreth. Më 25 qershor, ata urdhëruan instalimin e tre pompave zhytëse në një kanal me ujë të ndotur pranë sistemit të ujësjellësit, duke lejuar përzierjen e ujit të ndotur me atë të pijshëm. Analizat e kryera nga Instituti i Shëndetit Publik zbuluan praninë e baktereve koliforme në nivele shumë më të larta se ato të lejuara, si dhe përqendrime të rritura të klorit në ujë, duke e bërë atë të papërdorshëm dhe të rrezikshëm për konsum. Hetimet vazhdojnë, ndërsa të dyshuarit janë privuar nga liria dhe pritet vendimi i prokurorit për masat e sigurisë ndaj tyre.