Autoritetet në Gostivar kanë ndaluar përdorimin e ujit të pijshëm nga sistemi i ujësjellësit pas dyshimeve për ndotje të tij. Gjatë inspektimit u zbulua se në mënyrë të paligjshme ishin instaluar pompa që injektonin ujë të ndotur nga lumi Vardar direkt në gypin kryesor të furnizimit, duke rrezikuar shëndetin e mbi 1.200 qytetarëve që kërkuan ndihmë mjekësore me simptoma gastrointestinale. Spitali i Përgjithshëm “Dr. Ferid Murad” në Gostivar përballoi fluksin e madh të pacientëve dhe angazhoi personel shtesë në repartet më të ngarkuara. Hetimet e Prokurorisë, Policisë, Agjencisë për Ushqim dhe Veterinari, si dhe institucioneve të tjera janë në zhvillim, ndërsa priten rezultatet e analizave laboratorike për të konfirmuar shkakun dhe për të zbardhur përgjegjësitë penale.