Forca e Sigurisë së Kosovës në bashkëpunim me ekipin CMSE të Ushtrisë Amerikane dhe Komunën e Drenasit organizuan një Ushtrim në Tavolinë (TTX) me qëllim testimin e koordinimit institucional dhe reagimit ndaj situatave emergjente, konkretisht përballjen me vërshime. Në aktivitet morën pjesë përfaqësues të institucioneve lokale dhe qendrore, të cilët zhvilluan një skenar simulues për menaxhimin e krizave dhe testuan mekanizmat e koordinimit ndërinstitucional, proceset e vendimmarrjes, komunikimin dhe menaxhimin e burimeve në raste emergjente. Pjesëtarët e FSK-së prezantuan praktikat më të mira në fushën e menaxhimit të krizave dhe reagimit ndaj emergjencave, ndërsa kryetari i Komunës së Drenasit theksoi rëndësinë e përgatitjes dhe bashkëpunimit për mbrojtjen e jetës dhe pronës së qytetarëve. Ushtrimi shërbeu për identifikimin e sfidave, rritjen e gatishmërisë institucionale dhe forcimin e bashkëpunimit ndërmjet institucioneve përgjegjëse, duke kontribuar në ngritjen e kapaciteteve për reagim të koordinuar dhe efikas ndaj situatave të krizës.