Florie Selmani, vajza e Osman Selmanit, i cili u arrestua më 1 korrik nga autoritetet serbe me dyshime për krime lufte, ka bërë apel për ndihmë ndërkombëtare. Ajo kërkon nga organizatat që monitoruan refugjatët gjatë luftës në Kosovë të sigurojnë dëshmi që vërtetojnë se babai i saj ka qenë refugjat dhe nuk ka kryer krime. Familja Selmani kishte qëndruar në kampin e refugjatëve në Çegran, Gostivar, gjatë periudhës së konfliktit në vitin 1999. Florie i është drejtuar institucioneve si UNHCR, Komitetit Ndërkombëtar të Kryqit të Kuq dhe organizatave të tjera humanitare për të mbledhur dokumente dhe informacione që mund të ndihmojnë në zbardhjen e së vërtetës.