Bashkimi i Sindikatave të Pavarura të Kosovës (BSPK) paralajmëron se vala e të nxehtit po rrit ndjeshëm rrezikun për aksidente dhe pasoja fatale në vendet e punës, sidomos në sektorin e ndërtimtarisë, ku ndodh një pjesë e madhe e aksidenteve dhe vdekjeve. Të dhënat tregojnë se gjatë vitit 2025 janë regjistruar 602 lëndime në punë, me 33% në ndërtimtari, ndërsa vetëm në korrik të këtij viti tre punëtorë humbën jetën për shkak të kushteve ekstreme të temperaturës. BSPK thekson se kapacitetet mbikëqyrëse janë të pamjaftueshme, me vetëm 53 inspektorë për mbi 1.000 kantiere aktive, dhe kërkon masa të menjëhershme si ndërprerja e punës në orët më të nxehta, sigurimin e ujit dhe vendeve me hije. Sindikata ngre shqetësime edhe për kushtet e punës në institucionet publike dhe bën thirrje për intensifikimin e kontrolleve dhe mbrojtjen e punëtorëve për të parandaluar tragjeditë në vendet e punës.