Vasfije Krasniqi-Goodman, e mbijetuara e dhunës seksuale gjatë luftës në Kosovë, përloti publikun duke kujtuar se si 16-vjeçare ishte në dorën e armikut dhe sot ka mbështetjen e popullit shqiptar për të kërkuar drejtësi. Ajo bëri thirrje që viktimat e tjera të dalin publikisht dhe të bashkohen në kërkesën për përgjegjësinë e Serbisë për krimet e kryera. Në homazhet tek memoriali “Heroinat”, ajo falënderoi institucionet, organizatat dhe familjen për mbështetjen e vazhdueshme. Drejtoresha e Qendrës Kosovare për Rehabilitimin e të Mbijetuarve të Torturës, Feride Rushiti, theksoi rëndësinë e ngritjes së zërit të viktimave dhe nderimin e tyre në këtë ditë memoriale, duke përmendur edhe frikën dhe stigmatizimin që ende përballen shumë prej tyre.