Një i paraburgosur me inicialet K.K., i njohur si Korab Kabashi, ka ndërruar jetë mbrëmë në Klinikën e Emergjencës të Qendrës Klinike Universitare të Kosovës (QKUK). Ai ishte i mbajtur në Burgun e Sigurisë së Lartë dhe gjatë ditës kishte shfaqur probleme serioze shëndetësore, përfshirë çrregullime gastrointestinale dhe gjendje të rënduar të shëndetit. Pavarësisht trajtimit fillestar në burg dhe më pas në Qendrën Kryesore të Mjekësisë Familjare në Podujevë, gjendja e tij nuk u përmirësua, duke bërë që të transferohej në QKUK për trajtim specialistik. Megjithë përpjekjet e stafit mjekësor, ai ndërroi jetë rreth orës 23:20, ndërsa organet kompetente po zhvillojnë hetimet dhe pritet të përcaktohet shkaku i vdekjes përmes autopsisë.