Eksperti i sigurisë në punë, Naim Bajraktari, ka theksuar se vdekjet në vendin e punës duhet të jenë një alarm serioz për institucionet e Kosovës. Ai ka vënë në dukje mungesën e kontrolleve adekuate dhe moszbatimin e masave të sigurisë nga punëdhënësit, sidomos në sektorin e ndërtimtarisë, ku ndodhin më së shumti aksidente fatale. Bajraktari ka kërkuar rritjen e numrit të inspektorëve, pajisjen e tyre me mjete të nevojshme dhe shqiptimin e gjobave më të ashpra për shkelësit e rregullave të sigurisë, duke theksuar se pa masa ndëshkuese nuk mund të ketë përmirësim. Sipas Policisë së Kosovës dhe Sindikatës së Punëtorëve të Sektorit Privat, vetëm këtë vit janë regjistruar 13 vdekje në vendin e punës, përfshirë edhe rastin e fundit tragjik në Prizren, ku një punëtor 26-vjeçar humbi jetën gjatë procesit të betonimit.