Pas katër ditësh në gjendje kritike në spital, ka ndërruar jetë shoferi shqiptar Tili Pilinci, 39 vjeç, i aksidentuar në Siçili në një përplasje me një kamion të ngarkuar me fruta dhe perime. Në aksidentin tragjik që ndodhi në orët e para të mëngjesit të së hënës, humbi jetën edhe Flori Topalli, 24 vjeç, i cili ndodhej në të njëjtin automjet. Tili Pilinci u transportua fillimisht në spitalin “Barone Lombardo” në Canicattì, por për shkak të gjendjes së rëndë u transferua në reanimacionin e spitalit “Villa Sofia” në Palermo, ku mjekët luftuan për jetën e tij për katër ditë. Dy viktimat, të cilët jetonin në zonat e Canicattì dhe Naro dhe punonin si punëtorë sezonalë në bujqësi, po udhëtonin drejt vendit të punës kur ndodhi aksidenti. Autoritetet italiane kanë nisur hetimet për të zbardhur rrethanat e plota të ngjarjes.