Dhomat e Specializuara të Kosovës në Hagë kanë njoftuar se do të marrin vendim në kohën e duhur lidhur me kërkesën për lirim me kusht të ish-presidentit Hashim Thaçi. Mbrojtja e Thaçit ka paraqitur kërkesën më 6 korrik, duke ofruar garanci përfshirë një dorëzim prej 50 mijë eurosh. Në kushtet e kërkesës përfshihet edhe ndalimi i largimit nga territori i Kosovës, dorëzimi i pasaportës dhe dokumenteve të tjera të udhëtimit, si dhe ndalimi i deklaratave publike dhe diskutimeve mbi çështjen e tij jashtë ekipit mbrojtës. Zëdhënësi i Gjykatës Speciale, Michael Doyle, ka bërë të ditur se trupi gjykues do të japë përgjigjen brenda një afati të arsyeshëm.