Një 17-vjeçar nga fshati Bellopojë i Istogut është vënë nën hetim pasi publikoi në Snapchat një video ku shfaqeshin dy armë zjarri, njëra e shkurtër dhe tjetra e gjatë. Policia e Kosovës, pas marrjes së informacionit, ka bastisur shtëpinë e tij në prani të avokatit mbrojtës, por gjatë kontrollit nuk janë gjetur armë apo prova të tjera që lidhen me pamjet e publikuara. I mituri është intervistuar në stacionin policor në praninë e prindit dhe avokatit, ndërsa ndaj tij është iniciuar rasti për mbajtje të paautorizuar të armëve. Hetimet për identifikimin dhe origjinën e armëve vazhdojnë ende.