Gjatë natës së kaluar, në Stacionin e Pompave në Pusi Atit të Suharekës është kryer një vjedhje dhe demolim i trafostacionit elektrik që furnizonte me energji dy pompa të ujit. Si pasojë, këto pompa kanë mbetur jashtë funksionit, duke rrezikuar furnizimin me ujë në qytetin e Suharekës dhe në disa fshatra përreth, përfshirë Gelancën, Gjinocin, Leshanin, Terrnjen, Nepërbishtin dhe Shirokën. Kryetari i Komunës së Suharekës, Bali Muharremaj, ka bërë të ditur situatën dhe ka theksuar se Komuna nuk ka kompetencë direkte për menaxhimin e furnizimit me ujë, pasi kjo i takon KRU Hidroregjionit Jugor. Megjithatë, Komuna do të monitorojë situatën dhe do të ofrojë bashkëpunimin e nevojshëm për sanimin e dëmit dhe rikthimin sa më të shpejtë të furnizimit me ujë.