Një raport i Zyrës Kombëtare të Auditimit ka zbuluar vonesa të shumta në shqyrtimin dhe ekzekutimin e kërkesave për trajtim mjekësor jashtë institucioneve shëndetësore publike të Kosovës. Qindra mijëra euro mbeten të bllokuara për vite me radhë, ndërsa dhjetëra raste nuk janë marrë në shqyrtim që nga viti 2019 deri në vitin 2025. Problemet lidhen me mungesën e mekanizmave efektivë për ndjekjen e vendimeve të Bordit dhe vonesa në procedurat administrative dhe financiare pas miratimit të tyre. Për më tepër, janë konstatuar edhe lëshime në dhënien e fletëzotimeve pa plotësuar kriteret e nevojshme, duke rrezikuar transparencën dhe drejtësinë në trajtimin e pacientëve.