Në Gjakovë ka ndodhur një ngjarje e rëndë ku një person është vrarë dhe një tjetër është plagosur pas të shtënave me armë në rrugën “Vëllezërit Frashëri”. Prokuroria Themelore në Gjakovë ka iniciuar rastin për veprën penale “Vrasja e rëndë” dhe ka dërguar trupin e pajetë të viktimës për obduksion në Institutin e Mjekësisë Ligjore në Prishtinë. I dyshuari për këtë ngjarje është identifikuar, por aktualisht ndodhet në arrati dhe njësitë e Policisë së Kosovës po punojnë intensivisht për kapjen e tij. Prokuroria dhe Policia po mbledhin prova dhe po ndërmarrin të gjitha veprimet e nevojshme hetimore për zbardhjen e plotë të rastit.