Lëvizja Vetëvendosje ka nisur procedurat disiplinore ndaj Kushtrim Ramadanit, ish-kandidat për asamble në Prishtinë, i cili u arrestua pasi në lokalin e tij u gjetën lëndë narkotike dhe një armë. Zëdhënësi i partisë, Arlind Manxhuka, deklaroi se komisioni disiplinor po trajton rastin dhe vendimi do të merret në përputhje me rregulloren, duke përfshirë edhe mundësinë e suspendimit nga anëtarësia deri në përfundim të hetimeve. Policia dhe Prokuroria janë duke kryer hetimet për veprimtarinë e dyshuar të paligjshme, ndërsa partia thekson se nuk mund të zëvendësojë organet shtetërore në këtë proces. Arrestimi i Ramadanit u bë pas një bastisjeje në lokalin e tij në rrugën “Andrea Gropa” në Prishtinë, ku u konfiskuan katër gramë kokainë, një peshore digjitale, tre fishekë, një revole, 1300 euro dhe dy telefona.