Kompania Rajonale e Ujësjellësit “Prishtina” ka zbuluar një lidhje ilegale të ujit në Veternik, e cila dyshohet se është përdorur nga kompani ndërtimore për pastrimin e rrugëve dhe aktivitete të tjera. Sipas njoftimit zyrtar, përmes kësaj lidhjeje janë keqpërdorur mijëra litra ujë, duke dëmtuar interesin publik dhe shfrytëzuar në mënyrë të paligjshme një resurs jetik. KRU “Prishtina” ka publikuar edhe një video nga vendi i ngjarjes dhe ka bërë të ditur se rasti është nën hetim të plotë. Pas përfundimit të procedurave ligjore dhe verifikimit të gjendjes faktike, do të ndërmerren masa ligjore dhe rasti do të procedohet në gjykatë pa kompromis.