Policia e Shkodrës finalizoi operacionin e koduar “Neonët 9”, ku u zbulua një tunel i përshtatur për kultivimin e bimëve narkotike kanabis në lagjen “10 Korriku”. Në këtë ambient u sekuestruan 670 fidanë dhe bimë të dyshuara narkotike, si dhe 254 pajisje elektrike që shërbenin për kultivimin dhe tharjen e tyre, të furnizuara me lidhje të paligjshme të energjisë elektrike. Në flagrancë u arrestuan dy autorët kryesorë, shtetasit A. P. dhe K. H., si dhe një punonjës i OSHEE-së, D. S., ndërsa për tre punonjës të tjerë të OSHEE-së nisi hetimi për shpërdorim detyre në bashkëpunim. Operacioni u zhvillua nga strukturat e DVP Shkodër në bashkëpunim me Forcën e Posaçme “Shqiponja”, ndërsa materialet iu kaluan Prokurorisë së Shkodrës për veprime të mëtejshme.