Pesë ditë pas zhdukjes së 78-vjeçarit Xhafer Raqi, kërkimet për gjetjen e tij janë intensifikuar dhe perimetri i tyre është zgjeruar. Përveç familjes dhe grupeve qytetare, në kërkim janë angazhuar edhe Shoqata e Kërkim-Shpëtimit, Policia, Drejtoria e Emergjencave të Komunës së Prishtinës, Zjarrfikësit dhe Forca e Sigurisë së Kosovës. Aktualisht kërkimet po zhvillohen në zonat e Butovcit, Mramorit dhe Kolovicës, por ende nuk janë gjetur gjurmë të reja që të çojnë drejt gjetjes së tij. Një sandale e dyshuar se i përket të moshuarit u gjet më parë në Butovc, ndërsa Policia e Kosovës ka kërkuar ndihmë shtesë për zbardhjen e rastit.