Në orët e hershme të mëngjesit të 27 marsit, një zjarr i madh ka përfshirë barnatoren “Genista” në rrugën “Vëllezërit Gërvalla” në Ferizaj, duke shkaktuar dëme materiale rreth 300 mijë euro. Policia dhe zjarrfikësit kanë ndërhyrë shpejt, duke lokalizuar dhe fikur flakët, ndërsa nuk raportohet për persona të lënduar. Në vendin e ngjarjes janë gjetur një sëpatë dhe xhama të thyer, që ngre dyshime për zjarrvënie të qëllimshme. Hetuesit dhe krimteknikët kanë nisur mbledhjen e provave, ndërsa me urdhër të Prokurorit të Shtetit rasti trajtohet si “Zjarrëvënie” dhe hetimet janë në zhvillim e sipër.