Një zjarr i madh fushor shpërtheu pasditen e sotme në afërsi të Varrezave të Qytetit në Prishtinë, i shkaktuar nga djegia e hamulloreve. Zjarri përfshiu një sipërfaqe të konsiderueshme dhe rrezikoi disa shtëpi në zonën përreth, duke shkaktuar dëme materiale në parcela bujqësore, pemishte dhe objekte përcjellëse. Falë ndërhyrjes së shpejtë dhe profesionale të Brigadës Profesionale të Zjarrfikësve, zjarri u lokalizua dhe u parandalua përhapja e tij drejt banesave. Drejtoria për Siguri dhe Emergjenca e Komunës së Prishtinës ka bërë apel të fortë për qytetarët që të mos ndezin hamullore, barishte apo mbetje në hapësira të hapura, pasi një pakujdesi e tillë mund të shkaktojë dëme të mëdha dhe të rrezikojë jetën dhe pronën e tyre.