Në zonën e Trodhnes në njësinë administrative Ulëz të Bashkisë Mat, zjarri vijon të jetë aktiv dhe gjatë natës ka përfshirë disa stane të barinjve, duke djegur kasolle, ambiente për bagëtitë dhe një banesë. Pavarësisht ndërhyrjes intensive ajrore me një helikopter që operon prej katër ditësh, situata mbetet kritike dhe zjarri nuk është vënë ende nën kontroll. Një vatër tjetër zjarri ka shpërthyer mbrëmjen e kaluar në fshatin Mallunxë, në njësinë administrative Lis të Matit, ku forcat zjarrfikëse dhe emergjencat civile po punojnë për të izoluar flakët dhe për të mbrojtur banesat. Problematika vazhdon edhe në Bashkinë Bulqizë, ku një vatër zjarri aktive në malin e Lepurit po sfidon përpjekjet për shuarje dhe kontroll.