Malet përreth Prishtinës janë përfshirë nga zjarre të shumta për shkak të temperaturave të larta dhe kushteve të thata, duke rrezikuar pyjet, kafshët, pronat dhe jetën e qytetarëve. Komuna e Prishtinës ka bërë apel urgjent për qytetarët që të tregojnë kujdes maksimal, duke i paralajmëruar të mos ndezin zjarre në natyrë, të mos djegin barishte, hamullishta apo mbeturina dhe të mos hedhin cigare të ndezura. Në rast se vërejnë tym apo zjarr, qytetarët duhet të largohen nga zona e rrezikut dhe të lajmërojnë menjëherë zjarrfikësit në numrin 193. Komuna ka shprehur mirënjohje për zjarrfikësit dhe ekipet e emergjencës që po punojnë pa ndërprerje për të frenuar përhapjen e zjarreve, duke theksuar se një pakujdesi e vetme mund të shkaktojë një katastrofë të madhe dhe se mbrojtja e natyrës dhe jetës është përgjegjësi e secilit.