Në Shqipëri vazhdojnë të jenë aktive katër vatra zjarri nga gjithsej 20 të raportuara në të gjithë vendin. Autoritetet dhe strukturat e emergjencave po menaxhojnë situatën me 183 forca operacionale, 21 automjete zjarrfikëse, 80 pjesëtarë të Forcave të Armatosura dhe dy helikopterë të Forcës Ajrore. Zjarret më problematike janë në zonat Dajt–Qafë Priskë, Lundre në Mat, Vajkal në Bulqizë dhe Mallunxë në Mat, ku ndërhyrjet po bëhen edhe me mjete ajrore për shkak të terrenit të vështirë. Falë ndërhyrjes së shpejtë, disa vatra janë shuar plotësisht, duke shmangur edhe rreziqe të mëdha si kërcënimi ndaj tubacionit të gazsjellësit TAP në Therepel. Autoritetet mbeten në gatishmëri të plotë për të mbrojtur jetën dhe pasuritë e qytetarëve.