Ministria e Mbrojtjes njoftoi se gjatë 24 orëve të fundit janë regjistruar 28 vatra zjarri në Shqipëri, nga të cilat 4 mbeten ende aktive dhe 3 janë nën mbikëqyrje të vazhdueshme. Operacionet për shuarjen e zjarreve përfshijnë 330 forca operacionale, 35 automjete zjarrfikëse dhe mbështetje nga Forcat e Armatosura me 50 efektivë dhe një helikopter. Fokus i veçantë është në Qarkun Dibër dhe Elbasan, ku zjarret në zona si Qafë e Helmës, Vajkal, Mali i Dardhës dhe Mali i Qukësit po monitorohen dhe trajtohen me kujdes, pa rrezik për banesat. Reshjet e shiut në malin e Dajtit kanë ndihmuar në izolimin e vatrave, ndërsa Agjencia Kombëtare e Mbrojtjes Civile vazhdon monitorimin dhe koordinimin me strukturat lokale për të parandaluar riaktivizimin e zjarreve dhe për të mbrojtur jetën dhe pronën e qytetarëve.