Situata e zjarreve në Shqipëri paraqitet përgjithësisht e stabilizuar dhe nën kontroll, pa rrezik për zonat e banuara. Vatrat aktive ndodhen kryesisht në zonat e Dajtit, Cikalleshit dhe Priskës së Madhe, ku vijon ndërhyrja intensive nga toka dhe ajri për izolimin e tyre. Në Mallakastër dhe Krujë, zjarret janë nën kontroll, por ekipet zjarrfikëse dhe Forcat e Armatosura vazhdojnë monitorimin dhe ndërhyrjen me mjete të specializuara, përfshirë helikopterë dhe mjete zjarrfikëse. Strukturat e Mbrojtjes Civile paralajmërojnë se puna në terren do të vazhdojë deri në eliminimin e plotë të të gjitha vatrave aktive.