Një zjarr i fuqishëm shpërtheu në mëngjesin e së mërkurës në një pallat me 10 kate në lagjen Linkeroever të qytetit belg të Antverpit, duke shkaktuar disa viktima dhe të plagosur. Zjarri filloi në katin e tetë të ndërtesës ku jetojnë mbi 200 persona, ndërsa tymi i dendur pengoi banorët të largoheshin, duke i detyruar ata të barrikadoheshin në apartamentet e tyre dhe të prisnin ndihmën nga zjarrfikësit. Pamjet dramatike treguan banorë që shpëtuan duke u ngjitur nga ballkonet e fqinjëve, ndërsa forcat e emergjencës ndërhynë me shkallë për të evakuuar njerëzit. Policia dhe zjarrfikësit apeluan që banorët të mbyllnin dritaret dhe ventilimin për të shmangur përhapjen e tymit, ndërkohë që hetimet për shkaqet e zjarrit vazhdojnë.