Kompania për Menaxhimin e Deponive në Kosovë (KMDK) ka reaguar lidhur me zjarrin që shpërtheu në Deponinë Sanitare të Pejës, në fshatin Sferkë, duke sqaruar se kjo deponi nuk është nën menaxhimin e tyre. Menaxhimi i saj i takon Kompanisë Rajonale të Mbeturinave “Ambienti”, ku Komuna e Pejës është aksionari kryesor. KMDK ka vizituar vendin e ngjarjes dhe ka ofruar mbështetje profesionale dhe teknike për shuarjen e zjarrit, duke theksuar se ka dhënë ndihmë edhe më parë në situata të ngjashme. Në reagim, KMDK ka bërë thirrje për koordinim të institucioneve dhe kujdes në publikimin e informacioneve për të shmangur dezinformatat dhe konfuzionin te qytetarët.