Në Krujë vijon operacioni i vështirë për shuarjen e zjarrit që ka përfshirë zonën, me angazhimin e forcave policore, zjarrfikëse dhe emergjencave. Ministri i Punëve të Brendshme, Besfort Lamallari, njoftoi se Policia e Shtetit ka arrestuar autorin e zjarrvënies së qëllimshme, i cili do të përballet me pasojat ligjore për këtë vepër penale. Për shkak të rrezikut, është kryer evakuimi i pjesshëm i banorëve pranë vatrës së zjarrit, ndërsa forcat në terren dhe mjete ajrore vijojnë punën për neutralizimin e flakëve dhe mbrojtjen e zonave të banuara. Ministri Lamallari theksoi se situata është e vështirë për shkak të terrenit, por çdo mjet dhe forcë janë në dispozicion për të garantuar sigurinë e banorëve dhe për të ndalur përhapjen e zjarrit.