Vatra e zjarrit mbi lagjen Abaze në Krujë, pranë Kroi i Madh, mbetet aktive prej pesë ditësh, duke vënë në gatishmëri të lartë shërbimet e emergjencës. Për shuarjen e flakëve po ndërhyhet në mënyrë të koordinuar nga ajri dhe toka, me dy helikopterë që operojnë pa ndërprerje dhe forca zjarrfikëse në terren, të ndihmuara edhe nga banorët e zonës. Edhe pse disa herë është menduar se zjarri ishte fikur, ai është riaktivizuar për shkak të trashësisë së madhe të humusit në këtë zonë pyjore, i cili ruan prushin në nëntokë dhe nxit rindezjen e flakëve. Grupet e punës vijojnë betejën për të mbajtur situatën nën kontroll dhe për të parandaluar përhapjen e zjarrit drejt zonave të banuara.