Zjarri në afërsi të fshatit Nikushtak në Komunën e Likovës vazhdon të jetë jashtë kontrollit, duke kërkuar ndërhyrje të menjëhershme nga ajri për ta lokalizuar. Ekipet në terren, përfshirë Njësinë Kundër Zjarrit të Kumanovës, Pyjet Nacionale, policinë dhe banorët lokalë, po punojnë intensivisht për të mbrojtur banorët dhe pronat nga përhapja e flakëve. Gjatë ditës së djeshme, avionët „Air Tractor“ hodhën 81 tonë ujë në përpjekje për shuarjen e zjarrit, ndërsa drejtuesit lokalë dhe të Qendrës për Menaxhim me Kriza janë të angazhuar në koordinimin e veprimeve. Komuna e Likovës ka shprehur falënderime për të gjithë ata që po kontribuojnë në përballimin e kësaj situate emergjente.