Një shtëpi në fshatin Dolak të Vushtrrisë u përfshi nga zjarri gjatë natës, duke shkaktuar dëme të mëdha materiale dhe tronditur familjen e Driton Pllanës, djalit të vetëm të martirit të lirisë Sabri Hashim Pllana. Familjarët dyshojnë se shkak i zjarrit janë problemet e vazhdueshme me furnizimin me energji elektrike dhe tensionin e dobët në rrjet, për të cilat kishin bërë ankesa dhe peticione të shumta ndaj KEDS-it. Sipas tyre, ekipet e KEDS-it kishin konfirmuar ekzistencën e problemit dhe nevojën për ndërhyrje emergjente, por ndërhyrja nuk u realizua në kohë. Familjarët dhe banorët kërkojnë përgjegjësi dhe përkrahje nga institucionet dhe KEDS-i për rindërtimin e shtëpisë dhe për të shmangur tragjedi të ngjashme në të ardhmen.