Bojan Jevtiq, ish-toger i Policisë së Kosovës në pikën kufitare “Dheu i Bardhë”, është dënuar me gjashtë vjet burgim për spiunazh, pasi ka përcjellë te Shërbimi Inteligjent i Serbisë (BIA) dokumente dhe plane operative të Policisë së Kosovës. Sipas aktgjykimit të Gjykatës Themelore në Prishtinë, Jevtiqi ka vepruar në cilësinë e zyrtarit policor, duke cenuar besimin në institucionet e sigurisë dhe rrezikuar sigurinë kombëtare të Kosovës. Materialet e konfiskuara përfshijnë plane operative për situatën në veri, dokumente të klasifikuara dhe plane për zgjedhje të jashtëzakonshme në komunat veriore të vitit 2023. Gjykata ka vlerësuar si rrethanë rënduese pozicionin e tij si polic dhe vazhdimësinë e veprimeve, ndërsa si rrethanë lehtësuese është marrë parasysh pranimi i fajësisë, bashkëpunimi me drejtësinë dhe gjendja familjare e tij.