Një zyrtar i Drejtorisë së Urbanizmit në Komunën e Kaçanikut, Rufat Muqa, është arrestuar nën dyshimin për keqpërdorim të pozitës zyrtare. Ai dyshohet se gjatë procedurës për leje ndërtimore i kishte kërkuar një qytetari projekte shtesë të panevojshme, për të cilat kishte kërkuar pagesë mbi 600 euro, duke i udhëzuar që ta paguante në një kompani private gjeodezike. Megjithatë, këto dokumente nuk ishin pjesë e dosjes zyrtare dhe nuk kërkoheshin nga ligji për ndërtimin. Pas ankesës së qytetarit dhe hetimeve të Policisë së Kosovës në koordinim me Prokurorinë, zyrtari është ndaluar për 48 orë, ndërsa hetimet për këtë rast vazhdojnë.