Tre shekuj pas shpërnguljes së arbneshëve nga Shkodra në Zarë, komuniteti i tyre vazhdon të përballet me sfida të mëdha për ruajtjen e identitetit dhe gjuhës arbnisht, e cila po humbet gradualisht nga brezi në brez. Me rastin e 300-vjetorit të vendosjes së tyre, janë organizuar “Ditët e Kulturës Arbneshe”, ku morën pjesë figura të rëndësishme të arsimit, kulturës dhe studiues nga hapësira shqiptare, duke theksuar nevojën për veprime konkrete për mbrojtjen e trashëgimisë kulturore dhe gjuhësore. Banorët e lagjes “Arbanas” shprehin shqetësimin se gjuha arbnisht flitet vetëm në disa familje të rralla, ndërsa shumica e brezave të rinj nuk e zotërojnë atë. Në përpjekje për të mbajtur gjallë gjuhën shqipe, organizohen mësime plotësuese për nxënësit arbanas, ndërsa studiuesit dhe përfaqësuesit institucionalë nxisin reflektim dhe hapa konkretë për revitalizimin e arbnishtes.