Mbrëmë u zhvillua nata e parë gjysmëfinale e Eurovision Song Contest 2026 në Vjenë, ku u zgjodhën 10 finalistët e parë, ndërsa vëmendja tashmë është te gjysmëfinalja e dytë që do të mbahet më 14 maj. Shqipëria përfaqësohet nga Alis me këngën “Nan”, një interpretim emocional dhe i dedikuar figurës së nënës, që pritet të ngjitet në skenën e madhe me shumë pritshmëri. Alis ka ndezur atmosferën në Eurovision Village me një performancë të fuqishme dhe ka realizuar dy prova të suksesshme në skenën e festivalit, duke treguar përgatitje serioze dhe nivel të lartë artistik. Publiku shqiptar dhe diaspora janë të fokusuar te performanca e tij, duke shpresuar që “Nan” të sigurojë një vend në finalen e madhe të së shtunës.