Ministri për Evropën dhe Punët e Jashtme, Ferit Hoxha, mori pjesë në edicionin e 31-të të Manifestimit Kulturor Folklorik në Vena di Maida, Kalabri, ku vlerësoi rolin e jashtëzakonshëm të komuniteteve arbëreshe në ruajtjen e gjuhës shqipe, traditave dhe identitetit kombëtar për më shumë se pesë shekuj. Ai theksoi se arbëreshët janë një urë e gjallë lidhëse mes Shqipërisë dhe Italisë, duke përfaqësuar një shembull unik të ruajtjes dhe pasurimit të identitetit përmes bashkëjetesës dhe dialogut kulturor. Ministri falënderoi autoritetet lokale italiane dhe personalitetet akademike arbëreshe për kontributin e tyre në mbrojtjen e trashëgimisë kulturore, ndërsa rikonfirmoi angazhimin e Shqipërisë për forcimin e lidhjeve akademike, kulturore dhe shoqërore me këto komunitete. Në këtë kuadër, u mirëprit edhe iniciativa për ngritjen e Muzeut të Arbëreshëve në Vuno, që do të shërbejë si një qendër moderne për studim, edukim dhe dialog kulturor mes Shqipërisë dhe diasporës arbëreshe.