Kryeministri në detyrë i Kosovës, Albin Kurti, së bashku me ministren në detyrë të Kulturës dhe Turizmit, Saranda Bogujevci, priti delegacionin e Baletit Kombëtar të Kosovës pas një turneu ndërkombëtar në El Salvador dhe Kolumbi. Gjatë takimit, Kurti i falënderoi për prezantimin e suksesshëm të shfaqjes “Carmina Burana”, e cila u dha në gjashtë shfaqje në katër qytete të Amerikës Qendrore dhe Latine, me mbi 5500 shikues dhe bileta të shitura plotësisht. Ai theksoi se Baleti Kombëtar do të vazhdojë të mbështetet nga Qeveria dhe i cilësoi artistët si ambasadorë të rëndësishëm të Republikës së Kosovës. Përveç turneut në Amerikën Latine, balerinat kanë një program të ngjeshur në korrik dhe gusht, duke përfshirë shfaqje në Itali, Turqi, Austri dhe Tiranë.