Në kuadër të edicionit të shtatëmbëdhjetë të konferencës shkencore “Java e Albanologjisë”, në Institutin Albanologjik të Prishtinës po zhvillohet sesioni i Historisë me temën “Historiografia shqiptare përballë historiografisë evropiane”. Ky aktivitet ka mbledhur studiues, historianë dhe albanologë nga vendi dhe rajoni për të diskutuar zhvillimet dhe sfidat e historiografisë shqiptare në raport me atë evropiane. Gjatë sesionit prezantohen kumtesa shkencore që trajtojnë periudha dhe çështje të ndryshme historike, duke synuar thellimin e bashkëpunimit akademik dhe avancimin e studimeve në fushën e albanologjisë. “Java e Albanologjisë” njihet si një nga aktivitetet më të rëndësishme shkencore në Kosovë për promovimin e hulumtimeve dhe shkëmbimin e ideve në këtë fushë.